【A&M Diary】平時喺香港食韓國菜，店內有唔少靚仔oppa，夠晒養眼，真係視覺嘅一大享受。但位於旺角嘅韓燒大叔，店名就講到明只係得大叔。雖然無oppa，但都唔洗失望，反而可以專注韓燒大叔嘅出品呢！
韓式泡菜、韓式小食
韓燒大叔嘅午餐提供任飲任食嘅韓燒選擇，但今日胃口唔算強大，所以就叫咗韓式定食。午市套餐包每人三款韓式泡菜或韓式小食，包括傳統韓式泡菜、韓式白蘿蔔、韓式大豆芽、韓式薯仔、韓式炒粉絲等。
泡菜豬肉湯、韓式蘿蔔湯
除咗泡菜小食，午市定食仲有餐湯。泡菜豬肉湯、韓式蘿蔔湯都係充滿韓式風味嘅選擇，一款帶有微辣，另一款清甜。
韓式肥牛部隊鍋
部隊鍋嘅材料豐富：午餐肉、腸仔、雞蛋、魚糕、肥牛、冬菇、金菇、蔬菜、韓式年糕及韓國麵等。一開始食嘅時候仲略嫌唔夠辣，點知越煮越辣。呢個部隊鍋嘅份量十足，一個人肯定食唔晒。
