【A&M Diary】平時去食潮州粉麵，雲吞、魚蛋、牛腩通常都係三大熱門選擇，而墨魚丸唔係唔受歡迎，但通常都係雙拼或三寶時出現。但元朗嘅尚品墨魚丸大王就用心製作墨魚丸，讓墨魚丸成為主角，非常彈牙令人一試難忘。
香煎豬扒
雖然呢塊香煎豬扒望落平平無奇，但用上老板特別介紹咗隱藏食法，塊豬就變得出奇地好味，就係加上佢哋嘅魚露。而且因為豬扒係即叫即炸，生炸令肉質保持鮮嫩，帶有肉汁，絕對係誠意之作！
招牌墨魚丸湯河
既然呢度叫得自己做墨魚丸大王，又點可以唔試吓呢度嘅招牌墨魚丸呢！呢度嘅墨魚丸分別有白色同黑色兩款，白色就係普通墨魚丸，而黑色嘅就係墨汁墨魚丸。雖然佢哋顏色上有好大分別，但係兩款墨魚丸入口都超級彈牙，仲食到粒粒分明嘅墨魚粒粒。至於河粉非常滑溜，係店内嘅王牌選擇。
