【A&M Diary】估唔到喺元朗都搵到屬於天花板級別嘅韓式燒肉放題！呢間位於元朗嘅派龍殿，超過30款嘅肉類同蔬菜選擇，仲有凍熟海鮮、刺身壽司等食物，重點推介唔少得長龍牛舌、燒生蠔同韓式牛肋骨，質素極高！全個世界都有地板，但元朗嘅韓式燒肉放題天花板，就只有派龍殿。
凍熟海鮮 + 刺身壽司
系燒緊韓燒嘅時候，大家可以食住到海鮮、刺身同壽司，包括：凍蝦、凍青口、辣味炒蜆、泡菜、辣雲耳、三文魚刺身、希靈魚刺身、三文魚壽司等！凍蝦鮮甜彈牙，刺身新鮮，系唔錯嘅頭盤。
韓燒類
派龍殿嘅韓燒選擇真系超級豐富，有超過30款嘅肉類同蔬菜選擇，包括：牛仔骨、牛冧片、牛冧粒、原味豬扒、叉燒豬扒、豬腩片、辣雞翼、原味雞翼、南乳雞翼、豬頸肉、咖喱雞柳、原味雞柳、雞腎片、雞軟骨、龍脷柳、咖喱魷魚翼、魷魚須、多春魚、雞片、陳皮魚蛋、台灣腸、廚師腸、蒜蓉扇貝、芝士腸、菠蘿片、粟米、翠玉瓜、茄子等。我哋勁力推介咖喱魷魚翼，咖喱味香濃，醃得非常入味。另外，南乳雞翼都系非常驚喜，南乳味好惹味，雞肉嫩滑。
熟食類
除咗韓燒之外，派龍殿嘅熟食非常高質，好有心思，有魚湯卜卜蜆、蒸蠔、辣子豬腸、麻辣雙豬、小龍蝦、水煮牛、炸雞、商湯雜菜粉絲、鰻魚汁茄子冬菇翠玉瓜、烤雞扒、焗牛脷。麻辣雙豬系麻辣豬紅同豬手，豬紅煮得好入味，麻椒味香濃！另外，魚湯卜卜蜆十分清甜，蜆肉厚肉大大粒，完全無沙。
鐵板燒
派龍殿仲特設鐵板燒區，有專人同你燒，每日都有唔同嘅特色鐵板燒食品，我哋嗰日有長龍牛舌、燒生蠔同韓式牛肋骨。長龍牛舌燒得啱啱好，厚切嘅口感豐富，非常滋味。
飲品
派龍殿嘅飲品選擇都豐富，有各款啤酒、汽水、烏龍茶、檸檬茶、熱茶等。
