【Now.com】颱風小犬上星期吹襲香港後，大家有無覺得呢幾日除咗天氣好，秋意亦日漸明顯，早晚都有啲涼意。天文台預料，一道冷鋒會喺下星期後期抵達華南，該區氣溫下降。
8月7日立秋後，呢兩個月並未轉涼，氣溫超過30度嘅日子幾乎天天出現。天文台嘅「九天天氣預報」終於見到下周後期氣溫有較明顯嘅下降，天文台預料一道冷鋒會喺下周後期抵達華南，本港氣溫將會下降，下周六 (21日) 市區氣溫介乎21至25度，北區清晨時分更低至18度。
至於未來兩日周末天氣，部分時間有陽光，明日(14 日) 氣溫介乎25至31度，星期日介乎25至30度，隨後幾日天氣不穩定，有幾陣雨。天文台指，一股達強風程度嘅東北季候風會喺下周初至中期影響華南沿岸，該區風勢頗大。同時，一道廣闊低壓槽為南海中至北部帶來不穩定天氣，相關雲雨帶會覆蓋廣東沿岸，要到下周五 (20日) 先好轉，間中有陽光。
本港地區下午及今晚天氣預測，下午大致天晴及乾燥，今晚部分時間多雲，吹和緩東至東北風。可以趁呢個周末準備秋季衣服，下星期可以出動！
Photo / 資料來源：香港天文台
