有唔少過江龍嘅餐廳，挾住韓流人氣，而大受歡迎。但人氣過後，仍然深受大家追棒嘅，嗰啲就係叫實力！嚟自韓國過江龍嘅Outdark，以韓式炸雞成名，喺尖沙咀厚福街嘅H8多年，仍然屹立不倒，佢嘅炸雞真係又脆又Juicy㗎！
甜辣炸雞
嚟到Outdark又點可以唔試吓佢哋最出名嘅炸雞呢！估唔到半份嘅甜辣炸雞，份量都唔少。炸雞嘅炸粉厚薄適中，即叫即炸，所以夠晒脆卜卜，一啖咬開之後，入面勁多肉汁！加上甜辣嘅醬汁，夠晒惹味，亦可以中和油膩感。配菜方面就有薯角、薯條同薯塊，夠晒豐富飽肚！
炸醬麵
韓式嘅炸醬麵，絕對係韓國嘅國民美食之一！以黑豆為基礎嘅韓式炸醬麵非常甜，麵條、豬肉同洋蔥都掛港香濃嘅炸醬醬汁，又甜又惹味。
韓式烤牛肉
韓式烤牛肉出場嘅方式係用上熱辣辣嘅燒肉盤，絕對係今餐最驚艷期待嘅畫面。牛肉用咗蜜糖、醬油、芝麻碎同多種醬料嚟醃製，肉味份外突出，配料嘅酸瓜同年糕就全面吸收曬牛肉嘅肉汁，送飯真係一流呀！
