【A&M Diary】近排成日落雨，唔知你有無諗起呢首歌呢：「那些年錯過的大雨，那些年錯過的愛情 。」當年以為錯過的感情，原來更好的卻在面前，不過，味道都係昔日嘅值得回味。講緊嘅味道係台灣嘅古早味呀！嚟到葵興嘅大公雞，餐廳由台灣人主理，忘滿台式古早味。
台灣香蒜小香腸
每一片台式香腸配上一塊蒜片，蒜片嘅香味，加上香腸嘅油香，真係Perfect match！
椒鹽魷魚鬚
即叫即炸嘅魷魚鬚非常彈牙，炸粉唔會太厚，椒鹽將魷魚鬚嘅味道大大提升。
台式雞髀古早肉燥飯
講起古早味，當然唔少得必食嘅肉燥飯啦，豬肉碎配上微甜嘅醬汁，送飯一流。再加上滷得非常入味嘅原隻雞髀同滷水蛋，非常入味！
麻辣三寶手工麵
所謂三寶，即係大腸、牛筋、牛腩。台式嘅麻辣比較注重香味，所以湯底唔會太辣，而帶有濃濃嘅牛肉味。牛肉肉質軟腍並有濃酥嘅牛味；牛筋口感彈牙得嚟又完全吸收曬牛肉湯嘅精華；而大腸除左同樣吸收咗肉湯嘅味道之外，每件都有嚼勁。最值得一讚嘅係手工麵，質感軟硬適中，口感爽滑而彈牙。
