【A&M Diary】做運動除咗好玩又可以減肥之外，其實都係一個挑戰。如果你都想挑戰自己，攀石確實係一個唔錯嘅選擇！攀石除咗可以訓練體能之外，仲可以考驗耐性，戰勝「不可能」嘅心魔，當達到目標，嗰種成功感確實非常滿足。作為攀石初哥嘅我哋，今日就嚟到位於牛頭角嘅BoulderMAD室內攀石場，佔地超過2000呎，有30幾條唔同難度嘅攀石路線，啱晒各位攀石新手同情侶，盡情享受攀石嘅初體驗。
BoulderMAD室內攀石場
作為新手，推介位於牛頭角嘅BoulderMAD室內攀石場，場內空間非常寬敞，佔地超過2000呎，第一次玩就由高4米嘅抱石開始啦！其實抱石算係攀石嘅入門版，抱石牆一般高4米左右（攀石牆至少10米或以上）；由於抱石牆相對較矮，所以唔使繩索輔助，主要嘅保護設施就係抱石牆下嘅軟墊喇！
新手入門抱石班
雖然抱石唔需要繩索輔助，但都需要攀石鞋同粉袋等裝備。但我哋第一次玩抱石，所以咩裝備都無，好彩今次參加嘅BoulderMAD新手入門抱石班，已經包埋以上嘅用品，仲有1個鐘嘅課程，由教練指導室內攀石（抱石）嘅玩法、技巧、禮儀、安全事項等等，之後就可以全日無限時任玩，真係好抵玩呀！
抱石路線
課程期間，教練非常有耐性，亦多次提醒各項安全事項，咁就玩得更加放心啦！上完堂，終於可以盡情玩喇！一開始望住塊抱石牆，仲覺得抱石路線好easy，點知攀咗幾下之後，成個人定晒格，好似動彈不得，唔知點算…所以玩攀石/抱石，最忌心煩氣燥，最緊要冷靜思考，慢慢一步一步挑戰，相信自己，就一定能成功呢！
超過1000條抱石路線
BoulderMAD每三至四個星期就會定期更換路線，所以每一次嚟都有驚喜！BoulderMAD仲專登喺外國引入Kilter board，只需要連接手機app，就有超過1000條路線俾你任揀任攀！
其他課程
抱石過程雖然跌跌撞撞，但過程中可以訓練自己嘅自信心，到達目的地嘅時候，個種成功感真係難以形容！BoulderMAD除咗新手入門抱石班之外，仲有啱小朋友嘅兒童攀石課程，由小就可以訓練小朋友嘅體能同耐性呢！如果你有玩過攀石/抱石，或者好似我哋咁，上咗新手入門抱石班課程，咁下次再嚟玩，就可以直接買抱石場嘅日票、月票、季票、半年票、年票或共享票，非常有彈性，學生仲有額外優惠添，想幾時嚟玩都得啦！
