到期喇！到期喇！電話儲值卡「實名登記」限期今日 (23日) 屆滿。政府表示，如果今日內仲未為俗稱「太空卡」嘅舊有電話儲值卡完成實名登記，有關「太空卡」就會喺限期後被停用。
電訊商已按政府要求，向未登記嘅「太空卡」用戶發出最後「登記提示短訊」，用戶可按短訊內嘅link，或透過所屬電訊商嘅網頁，或流動應用程式 (App) ，把握時間今日內完成實名登記。
用戶應按指示提供香港身份證上嘅資料，包括中英文姓名、出生日期、香港身份證號碼及副本，就可以完成登記。
電訊商亦會延長門市及客戶服務熱線嘅服務時間，18間設有實名登記服務櫃位嘅指定郵政局，亦會延長服務時間至今晚7時。政府設於25個指定港鐵站嘅支援服務站，開放到下午6時，即場協助有需要嘅「太空卡」用戶進行登記。
當局早前表示，只要儲值卡未到期，之後仍可到電訊商補辦登記手續，就可以用得番。
通訊局熱線：2961 6699
