【A&M Diary】「Every night in my dreams, I see you, I feel you…」一亨起呢首歌，相信鐵達尼號經典嘅電影場面，浪漫又淒美嘅故事都會喺你心中一一湧現。電影改編自1912年4月10日鐵達尼號首航嘅故事，由英國出發前往美國紐約，但不幸撞上冰山而遇上海難。鐵達尼號至今雖然已經沉沒超過一百年，但大眾對呢架船仍然充滿好奇，想認識鐵達尼號，就要由北愛爾蘭貝爾法斯特嘅哈蘭德與沃爾夫造船廠開始，喺鐵達尼紀念館了解鐵達尼號嘅真實故事。
愛爾蘭歷史
嚟到鐵達尼號紀念館，就由了解愛爾蘭嘅歷史開始。愛爾蘭本身係聯合王國嘅一部份，但因為民族主義抬頭，加上宗教摩擦、政治動盪、愛爾蘭大飢荒等原因，令愛爾蘭走向獨立。而北部嘅6個郡就選擇組成北愛爾蘭，繼續留喺聯合王國，但其實北愛爾蘭直至90年代都仲有唔少鬥爭武裝，喺一個戰爭嘅黑暗時代。鐵達尼號紀念館展出唔少海報同標語，表達當時愛爾蘭同聯合王國嘅矛盾。
哈蘭德與沃爾夫造船廠
船廠喺1861年成立，係當時聯合王國，以至歐洲數一數一嘅造船廠。二戰期間，更加係哈蘭德與沃爾夫造船廠嘅顛峰時期，製造過百艘航空母艦、巡洋艦、海軍艦艇等。除咗戰艦之外，鐵達尼號亦係喺哈蘭德與沃爾夫造船廠出品。喺鐵達尼號紀念館，我哋就可以乘坐時定飛船，了解當時船廠嘅故事。
鐵達尼號
1909年，鐵達尼號（RMS Titanic）喺北愛爾蘭貝爾法斯特動工，直至1912年3月31日完成所有內部裝修，並準備喺1912年4月10日由南安普敦出發。鐵達尼號係英國白星航運公司旗下嘅三艘郵輪之一，建成後全長269.1公尺，寬28.2公尺，排水量達52,310英噸，最高載客量為3,547人。設有10層甲板，其中8層供乘客使用，係當年全世界最大最豪華嘅郵輪，而且鐵達尼號嘅設計能夠承受4個隔艙入水，所以被譽為當時最安全嘅郵輪。喺1912年4月10日12點，鐵達尼號離開英國南安普敦港，中停法國嘅瑟堡同愛爾蘭嘅皇后鎮後，就載住2,224名船員及乘客跨越大西洋前往美國紐約，但喺航行嘅第5日，即1912年4月14日夜晚11點40分，不幸撞上冰山，加上船上逃生設施不足及人為失誤，令生還的人數只有30%左右，最終喺1912年4月15日凌晨2時20分鐵達尼號完全沉沒，超過1500人罹難。
鐵達尼號紀念館
鐵達尼號紀念館建於鐵達尼號嘅出生地：北愛爾蘭貝爾法斯特嘅哈蘭德與沃爾夫造船廠，真係極具意義。紀念館最特別之處係將唔同嘅船艙以1:1重現，大家可以睇到當時鐵達尼號頭等艙嘅豪華，亦可睇到三等艙嘅情況，形成貧富間嘅對比。另外，鐵達尼號紀念館內亦以270度嘅短片重現鐵達尼號每一層甲板嘅設施，例如溫水游泳池、健身房、壁球室、土耳其浴室、多間餐廳等，以當年嚟講，確實非常豪華，睇住呢條短片，真係好似置身於鐵達尼號入面咁啊！
