【A&M Diary】Facebook俾啲泰國旅行相洗晒版，搞到我都好想去泰國呀！不過，年尾無晒假，所以食泰國菜頂住癮先。講起泰國菜，就梗係要食正宗泰國人主理嘅餐廳啦！今次嚟到位於牛頭角嘅小店：季稻。餐廳充滿泰國色彩，真係以為自己去咗翟道翟呀！
炸魚餅
炸魚餅即叫即炸，由新鮮魚肉混入其他泰式香料製成。所以味道好有層次，仲帶有少少辣味，爽口彈牙，絕對係最好嘅小食。
泰式蕉葉燒魚
季稻嘅泰式蕉葉燒魚以傳統正宗泰北做法，用蕉葉去包住成條魚嚟燒，所以除咗食到魚嘅原汁原味之外，仲帶有蕉葉嘅香味，好有層次。至於，燒魚用上馬友，魚肉驚喜地嫩滑多汁，蘸埋泰式嘅青辣椒醬，味道即刻提升到另一個層次！
泰式香烤雞飯
雞皮香脆唔油膩，雞肉鮮嫩juicy，配合泰式甜酸醬，酸酸甜甜，非常醒胃。
香葉肉碎煎蛋飯
呢個餸係泰國人嘅日常菜式，以羅勒葉配上青豆及肉碎，配上一隻燶邊煎蛋，撈飯一流。
