【A&M Diary】世界上有唔少以歷史、文化、藝術等題材嘅博物館，當中要數人氣最高嘅博物館，就唔少得位於紐約嘅美國自然史博物館（American Museum of Natural History）啦！美國自然史博物館之所以一直人氣高企，除咗因為展品吸引之外，更因為係《翻生侏羅館》嘅拍攝場地，唔知啲展品夜晚係咪真係會郁嘅呢？
紐約自然歷史博物館
博物館喺1869年建館，館內分成46個展廳，以天文學、地球科學、人類學、古生物學、生物學為主題，展出超過3600萬件展品。真係行一日都行唔晒，所以我哋精選咗以下必睇推介！
美國自然史博物館 – 化石館
化石館絕對係美國自然史博物館最多鎮店之寶嘅區域！當中最出名嘅就係白堊紀嘅泰坦巨龍、暴龍、已絕種嘅長毛象等古生物化石。呢度嘅化石都保存得好好，並以真實比例展出，真係非常震撼。
美國自然史博物館 – 太平洋人類展區
如果有睇《翻生侏羅館》，入面最cute嘅展品一定係「DUM DUM, give me GUM GUM」嘅復活節島摩艾石像，喺太平洋人類展區就睇到佢嘅真身，絕對需要瘋狂打卡啦！
