【A&M Diary】去美國東岸旅遊，費城通常都會被大家忽略，因為費城嘅景點唔多，但卻有一個絕對值得大家停留嘅原因！Eastern State Penitentiary（東州監獄）係美國最古老嘅監獄古蹟，活化成為博物館之後，監獄接近完全還原原貌，除咗可以讓大家了解美國監獄嘅歷史，監獄更加係一個充滿打卡位嘅景點呀！
Eastern State Penitentiary（東州監獄）喺1829年10月25日啟用至1971年關閉，被認為係世界上第一座現代化監獄。Eastern State Penitentiary（東州監獄）以車輪式設計，由中心嘅控制塔放射至7個監倉，直至不斷擴建至依家嘅模樣。加上監獄採取當時罕見嘅單獨囚禁制度，而成為之後全球300幾間監獄建築同制度嘅參考藍本。
Eastern State Penitentiary（東州監獄）主要囚禁搶劫同盜竊嘅輕罪罪犯，但亦有唔少惡名遠播嘅囚犯，例如凱萊爾大屠殺嘅罪犯等。講到監獄，大家一定會諗起逃獄嘅故事，喺1945年4月3日，就有12 名囚犯進行了一次重大嘅越獄，佢哋利用左一年嘅時間，喺監獄挖掘咗一條30米嘅隧道逃走，喺Eastern State Penitentiary（東州監獄）參觀時就可以親眼睇到呢條隧道同了解逃獄嘅故事喇！
Eastern State Penitentiary（東州監獄）為咗減少囚犯之間嘅互動，所以實行單獨囚禁制度。每個囚室入面，都有抽水馬桶、水龍頭同暖爐，以當時嚟講係非常先進，並成為美國有史以嚟建造最大同最昂貴嘅公共建築物。至於囚室嘅門好細，令囚犯要彎身先可以出去，目的係減少對軍官的攻擊，而且進出囚室都要鞠躬，讓囚犯有懺悔之心。
Eastern State Penitentiary（東州監獄）入邊亦有理髮店、醫院、手術室、教堂、廚房、操場等設施，當然唔少得死囚嘅囚室啦！其實呢個監獄並無執行過死刑，但監獄始終帶有一種陰森嘅感覺，所以Eastern State Penitentiary（東州監獄）設有期間限定嘅萬聖節夜場參觀活動，讓大家有另一種監獄體驗。
最後，喺Eastern State Penitentiary（東州監獄）入邊其實有唔少藝術裝置，讓大家可以了解歷史同時細味藝術。大家喺參觀嘅尾聲，可以去到監獄郵室，寫信俾服刑中嘅囚犯，等佢哋可以有心靈嘅寄托。
