【A&M Diary】住喺倫敦，放假去邊度玩好呢？今個weekend我哋就選擇距離倫敦一個鐘頭車程嘅布萊頓（Brighton），布萊頓（Brighton）係一個沿海城市，除咗海灘之外，亦有唔同嘅旅遊景點，加上氣候宜人，係英國嘅熱門度假勝地之一。如果你都想去布萊頓（Brighton）玩，即刻睇吓我哋推介嘅9個布萊頓（Brighton）必去必食嘅好去處同布萊頓（Brighton）嘅交通攻略啦！
布萊頓（Brighton）交通攻略
布萊頓（Brighton）嘅市區面積唔大，如果你集中布萊頓（Brighton）市區嘅景點，行路其實最方便，因為景點同景點之間嘅距離非常近，等巴士嘅時間分分鐘都已經行到目的地喇！但如果去郊區嘅景點，例如以下推介嘅七姊妹巖（Seven Sisters Cliff）、Saltdean Beach等，就建議你用手機應用程式（Brighton & Hove Buses）購買巴士全日通車票，咁就更加抵啦！
1. 布萊頓好去處：七姊妹巖 Seven Sisters Cliff
地址：Eastbourne BN20 0AZ（郊區）
詳細攻略：
最美的世界盡頭 布萊頓七姊妹巖
七姊妹巖（Seven Sister Cliff）位於英國南唐斯國家公園（South Downs National Park），七姊妹巖（Seven Sister Cliff）全長幾公里，最高點175米，最大賣點就係七座白堊斷崖，而對岸就係歐洲大陸嘅法國，所以被稱為「世界的盡頭」。有唔少電影喺呢度取景，例如《哈利波特：火盃的考驗》、《福爾摩斯2：詭影遊戲》等。
2. 布萊頓好去處：British Airways i360
地址：Lower Kings Road, Brighton BN1 2LN（市區）
詳細攻略：（製作中）
3. 布萊頓好去處：布萊頓海灘 Brighton Beach
地址：Kings Road Arches, Shelter Hall, Brighton BN1 1NB（市區）
英國嘅海灘唔多，而位於英國南部嘅布萊頓（Brighton），喺夏天嘅時候，就會成為英國最熱嘅地區之一，唔少英國人放假都會嚟到布萊頓（Brighton）度假，享受呢度嘅陽光與海灘！講到布萊頓（Brighton）最方便嘅海灘，當然係布萊頓海灘（Brighton Beach）啦！另外，海灘兩邊都有唔少酒店同餐廳，絕對有種海島休閒度假嘅感覺。不過布萊頓海灘係一個石灘，如果想要軟綿綿嘅細沙，呢度就搵唔到喇！入夜之後，海灘就會搖身一變，有唔少beach side party，真係由朝玩到黑！
4. 布萊頓好去處：布萊頓碼頭 Brighton Palace Pier
地址：Madeira Dr, Brighton BN2 1TW（市區）
喺布萊頓海灘（Brighton Beach）嘅旁邊就係布萊頓碼頭（Brighton Palace Pier），呢個碼頭無船坐，但就深受小朋友嘅喜愛。碼頭上面除咗有餐廳之外，亦有小朋友最鍾意嘅室內遊樂場，入邊有推銀機等電子遊戲設施，至於室內部份更加設有唔少大型機動遊戲，係布萊頓（Brighton）其中一個熱門嘅旅遊景點。
5. 布萊頓好去處：英皇閣 Royal Pavilion
地址：4/5 Pavilion Buildings, Brighton BN1 1EE（市區）
如果想打卡嘅，就一定要嚟到布萊頓（Brighton）嘅地標英皇閣（Royal Pavilion）。英皇閣（Royal Pavilion）喺1823年啟用，當時喺英國皇室嘅宮殿，設計師以印度伊斯蘭為設計風格。英皇閣（Royal Pavilion）依家已經活化成為一座博物館，入場需要收費而且唔能夠影相，至於外圍就係市民嘅休憩地方，大家可以準備野餐食物，喺富麗堂皇嘅英皇閣（Royal Pavilion）外野餐。
