《魷魚遊戲》熱潮一浪接一浪，不少商家相繼推出相關產品，如糖餅、面具、外套。同樣喜愛《魷魚》的陳毅燊（ANSONBEAN），決定化身劇中主角，身穿經典綠色運動服，拍攝翻唱歌曲《INDUSTRY BABY》的MV，型格之餘又令觀眾有少少毛骨悚然，相當貼近潮流。
適逢萬聖節前夕，ANSONBEAN推出最新翻唱MV，重製了由Lil Nas X Jack Harlow原唱的《INDUSTRY BABY》，改以《魷魚遊戲》主題拍攝音樂影片，還原劇中部分場景，「我好鍾意做跳唱cover，最近鍾意咗《INDUSTRY BABY》呢首歌，然後又成日發夢玩『魷魚遊戲』，加上歌詞同個劇嘅故事呼應到，又適逢Halloween，就夾埋一齊玩大佢！」
MV中他身穿號碼456的運動服，他被一班戴上面具的紅衣人脅持。鏡頭一轉ANSONBEAN已換上全黑西裝，在Club裡大跳勁舞。
由製定企劃大綱、道具、排舞、錄歌、租場，皆由ANSONBEAN一手包辦，他直言時間緊迫、有沉重壓力，但看到結果收成時特別有滿足感，「自己一腳踢自由度好大，但要準備嘅嘢好多，全部自己搞掂，好有成功感。」他又指錄音過程學到不少東西，「係難得嘅學習過程，能提升唱功，好好玩，同做自己嘅歌感覺好唔同。」
以往企劃多以跳舞為主，ANSONBEAN指一直希望拍武打片：「最有趣拍打交戲，加埋『魷魚遊戲』經典場口，好啱Halloween。下次可能會打得再勁啲，今次比較隨意，下次認真度啲更勁嘅場面，例如打爛晒啲嘢，或者用刀用槍。（今次都有道具槍喎！）唔係我用，我只係被人用槍射殺嗰個！」
《INDUSTRY BABY》原由Lil Nas X Jack Harlow主唱，早前公開為同性戀的Lil Nas X，透過MV橋段及歌詞控訴社會對同性戀者的不公，以及反擊別人對他上一個MV《Montero (Call Me By Your Name)》的批評，例如被指裸露MV鏡頭太多。
