香港租貴、物價貴，父母要應付龐大家庭支出，令「雙職家庭」數目愈嚟愈多，好多都依賴工人姐姐或保母幫手湊BB。今日網上就瘋傳一條短片，見到一個保母疑似粗暴地將BB撻落地，引起公憤！
從網上流傳影片可見，事件應發生喺今朝7點幾，涉事保母原本餵緊BB飲奶，不過BB疑似扭計唔肯飲，保母就表現唔耐煩，隨手將BB撻落地墊，BB立即聲嘶力竭大哭，惟保母仍然面不改容，更話「嗌呀，你嗌呀，做乜嘢事」，絲毫無打算安撫BB。之後保母又再嘗試餵奶，但都唔成功，保母再講「好呀」、「加油呀」之後就離開BB，由得BB獨留原地慢慢喊。期間保母曾三次望向鏡頭，似係想確認係咪錄影當中。
涉事保母立即被起底，據了解她大約50幾歲，自稱鍾意小朋友，亦有提供陪月服務。網友就狂鬧保母「無人性」、「冷血」，建議僱主盡快報警處理，以免再有下一位受害者。
Photo & Video / 網上片段
