【A&M Diary】好多人覺得藝術嘅嘢識條鐵咩！但藝術唔一定只係存在喺藝術館內嘅雕塑、畫像同陶藝，其實藝術一直都喺我哋身邊。由香港設計中心主辦嘅「#ddhk設計#香港地」踏入第三年，今年以蛻變為主題，將深水埗區內嘅公共空間同小店打造成城區設計廊，以「深水埗人_人」為今年活動名稱，提供兩條自助漫遊路線，等你重新認識深水埗。
深水埗
大家所認識嘅深水埗，一定離不開鴨寮街。其實深水埗近年由傳統嘅舊區發展成創意產業，加上呢度有唔同嘅種族人士居住，令呢個地方更多元化。
大南街垃圾收集站
今日我就同A姐嚟到界限街嘅大南街垃圾收集站開始漫遊深水埗。垃圾站？！因為喺深水埗有唔少嘅舖頭都有貓店長，所以貓就成為咗深水埗一個成員。喺垃圾站嘅外牆就由本土藝術家兼插畫設計師Khristopher聯同一班義工，創作左呢幅「人人和喵dd」，主題除咗係佢哋對貓店長嘅印象，背景亦以棉花呼應深水埗布料行業。另外，喺呢幅畫作上面，亦有隱藏嘅多啦A夢，大家嚟到嘅時候就考吓眼力啦！
南昌街休憩處
深水埗除咗有各種嘅攤檔、地道小食同售賣電子產品聞名之外，其實深水埗亦係一個多元文化嘅社區，除咗基層香港人之外，呢度亦有唔少南亞族裔。所以喺南昌街休憩處就由街坊同設計師合作，設計左「人人鬆dd」，將唔同民族嘅語言寫出嚟，大家除咗可以透過QR code了解字句嘅意思同欣賞各地方嘅地道音樂之外，更加可以同身邊唔同種族嘅朋友透過呢啲標語作為你哋嘅開場白，為街坊同遊客提供一個相聚嘅實體聊天室，令多元嘅社會更加融合。
喺南昌街休憩處除咗有手繪標句之外，亦有Simple People人像，包括曾經喺深水埗開武館嘅葉問、喺深水埗讀小學嘅許冠傑、同曾經喺深水埗居住嘅黃霑同黃家駒等等，表示深水埗係一個臥虎藏龍嘅地方。
阿里皮革
深水埗可以話係一個尋寶嘅地方，如果你肯花啲時間嘅話，可能都會搵到唔少心頭好。例如呢間皮革店就有唔同嘅皮革手藝，大家除咗可以直接選購店主設計嘅皮袋或皮革銀包，亦可以買啲真皮返去，創作一個屬於自己嘅皮革手工。
