【A&M Diary】近排天氣咁熱，最啱嘅消暑方法，就梗係玩水上活動啦！位於大埔嘅白鷺湖互動中心就推出期間限定嘅水上充氣競技場（Flow Academy Aqua Park）。佔地約3萬呎嘅水上充氣競技場，除咗有離心力代表嘅十米高瀡滑梯、炮彈飛人等等之外，仲可以玩埋水上障礙賽，挑戰個人極限，絕對係尖叫聲不絕。
前往方法
1. 乘坐港鐵至大埔墟站轉的士，車程約10分鐘
2. 乘坐港鐵至大埔墟站轉綠色小巴28K或九巴72、72A、73A及74A，喺翡翠花園/南苑落車，再步行5至10分鐘
3. 自駕遊：提供數十個免費車位，先到先得
提提你
1. 每節活動時間為1小時（包括5分鐘安全講解環節）
2. 每節場內人數限定150人
3. 除咗進行水上活動，其他時間必需佩戴口罩，並保持適當社交距離
4. 入口處會為所有訪客作體溫檢測，凡超過37.5度之人士將不能進入場地
更衣室及儲物櫃
玩水上充氣競技場（Flow Academy Aqua Park）嘅第一站，當然係嚟到更衣室同儲物櫃啦！值得一讚嘅係，呢度嘅更衣室非常乾爽呀！至於儲物櫃收費為$50 ，當中$30為可退還嘅按金，價錢絕對合理。
安全規則
落水之前，就由現場工作人員協助我哋着上救生衣，講解安全規則，做埋熱身運動，就可以落水挑戰水上充氣競技場（Flow Academy Aqua Park）喇！
障礙賽
水上充氣競技場（Flow Academy Aqua Park）設更有5條不同難度嘅障礙賽，主要講求參加者嘅速度、體力同技巧。其中搖擺馬卡龍同水上滾輪真係充滿挑戰性，經過多次挑戰失敗，而最終成功之後，真係充滿成功感同疲累緊！
三色滑梯
整個水上充氣競技場（Flow Academy Aqua Park）最講求膽量嘅，就係呢條高10米嘅三色滑梯！三色滑梯嘅斜道各有不同，當中接近垂直90度嘅就係中間嗰條，速度衝力非常快，都嚟唔及尖叫，就會飛落水喇！
