【now.com生活】今日跌到得十二度，又係時候請人食「凍柑」。不過玩還玩，雙手長期咁凍可能係健康警號！Now生活教室繼續有註冊中醫師曹信恩，教大家點樣行氣活血。
曹醫師話喺中醫角度，手腳冰冷係因為係氣血不足同埋體質陽虛，血液循環不良令溫度帶唔到去手腳。要解決問題，首先最緊要係保暖，女仔冬天盡量唔好着短裙，喺屋企記得着拖鞋。第二，唔好以為冬天就可以偷懶唔做運動，適量嘅運動可以促進血液循環。
至於飲食方面，曹醫師提大家要吸收足夠糖分同埋碳水化合物，另外，羊肉屬溫性，可以驅寒暖身，適合入冬時節食用。飲用養血嘅湯水如紅棗水，當歸煲湯等等，都可以幫助行氣活血，改善手腳冰冷嘅問題。
特別鳴謝：曹信恩中醫師
