【now.com生活】夏日熱辣辣，個個都匿埋喺冷氣房歎世界嘅時候，究竟呢3位維園鮮肉搞乜打大赤膊，喺公園同阿伯爭地盤？！
哦～原來佢哋做緊街頭健身運動，咁究竟乜野係街頭健身呢？街頭健身，其實就係利用自身嘅體重，配合公園唔同嘅機械嚟鍛鍊身體嘅運動，就算係公園阿伯，只要佢利用公園設施，做出高難度嘅動作，都可以稱為街頭健身。
街頭健身喺香港愈黎愈流行，香港街頭健身冠軍黃煒峰（Nicolas）話呢項運動唔淨只男仔玩，亦愈嚟愈多女仔參與，強身健體之餘，仲可以令肌肉線條更加靚㖭！除咗一啲經典嘅高難度動作，例如人體國旗（Human Flag）同埋俄式挺身（Planche），街頭健身仲包括，幾個人一齊完成嘅合技，做起上嚟都唔簡單架。
Nicolas話，好多人一開始只係專注喺動作，忽略咗肌肉訓練，所以大家唔好以為佢哋喺公園做運動，好似好兒戲呀，其實佢哋落咗好多苦工架，你睇下佢哋就係因為街頭健身，先有咁健碩嘅身型，你睇睇佢哋以前⋯⋯
嗱，連喺公園做運動都可以操到咁fit，呢個夏天再無藉口嫌gym貴，唔減肥啦各位！
