【now.com生活】人生如戲，戲如人生。
必需承認，喺職場社會浸淫咗一段時間，自己亦無可避免咁戴住個面具做人。返工係一個工作認真嘅經理，收工返屋企做一個好爸爸好老公，朋友聚會我係一個聆聽者同活動搞手……你問而家嘅我係咪真正嘅自己，對唔住，我真係答你唔到，你問我有幾耐冇講過一句真心說話，我亦都真係唔記得，亦唔想去深究。
點都好，戴面具做人唔係一件壞事，只要大家舒服同互相尊重，我絕對唔介意對方戴住面具對自己，以假相待，有時候更樂得輕鬆。
我有一個嗜好，就係好鐘意透過對方一舉一動同行為去分析一個人（原因請看小弟的自傳故事），分析佢係咪一個值得為佢工作嘅上司，又分析下下屬係咪一個負責任嘅人，等我可以將重任交俾佢。
曾經跟過一個經理，好多人話佢處事嚴謹，工作認真，我卻有另一個睇法，就係經理係一個佔有慾同控制慾好強嘅人。
返工遲到五分鐘，佢會問你去咗邊。你答佢塞車，佢就會話繁忙時間就應該預咗塞車，所以要提早上班，呢個不成理由。行開個位做嘢，佢打電話搵唔到你，就會發晒茅咁四圍搵你，睇你喺邊，想知你係唔係偷懶。
打工仔有邊個未試過做漏嘢？有時候上司問到未做都會話做咗，然後自己急急腳返去補鑊，但係對住呢個經理，講大話就真係好大鑊。佢一早已經暗地裡檢查你嘅工作有冇完成，然後再問你有冇做到，你答有佢就會兜口兜面篤爆你話你講大話，答佢冇，就會俾佢質到你無地自容。
對住佢，你會好有壓力，覺得無論自己講乜做乜都好，佢都會睇穿你。可能有人話，咁樣做事同事工作先會認真，但換轉角度睇，將同事箍得咁緊，同事又係咪做得開心，願意同你一齊打拚。
人與人之間最重要就係信任，追求嘅係自由、尊重同平等。呢啲顯淺道理都做唔到，人際關係一定唔好。
經理係單身定已經已婚？
答案，昭然若揭。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
〈不是庸材〉每隔周四刊登
專欄屬作者個人意見，不代表本網立場。
