【now.com生活】「管理」呢兩個字其實好似浮雲，以前讀書少不免要接觸呢一個學科，但你問我讀過啲乜，我真係唔記得，就算記得，都唔知點樣答你。
人到中年，跟過唔少上司，?家做緊同事上司，發現管理呢兩個字根本就冇一個標準答案，因人而異，不過我嘅總結好簡單，就係上司叫下屬做嘢，而下屬冇辦法唔死死地氣去做。管理兩個字看似簡單，但叫下屬做事做到心服口服呢下先至難。
好多人啱啱升職，又或者係轉咗去新公司之後雄心壯志，諗住創一番事業，於是新上任無耐就來個大改革，將舊有嘅管理制度推倒重來，要求所有同事依據新要求做事，結局，不難預料，一係就同事唔聽新上司指揮，一係就同事集體辭職，費時失事。
曾經，我都跟過呢一類經理。
當時我工作嘅地方係行內俗稱嘅爛盤，基本上乜人去做都好，結局都唔會有好下場，有一位經理由其他公司轉職過嚟，佢返工無耐就已經同同事講話我哋過往做事手法有問題，跟進不足先至令到工作如此難做，話只要跟佢嘅方法做事，所有問題都可以輕易解決。
之後，經理將佢嘅一套強行應用喺我哋身上，強迫同事跟新指引做事，否則就會出警告信。同事知道之後個個都怨聲載道，先不論新指引係咪真係可以改變工作質素，同事只覺得過往曾經為公司付出嘅心力唔得到尊重，覺得自己被人否定。
就係咁，經理越迫，同事就越反抗去證明以前嘅制度係無問題，而之後更演變成經理叫人做嘢而冇人理佢嘅呢個困局。
呢個世界，有強權冇公理，但喺職場上面，冇能力叫下屬做嘢嘅上司⋯⋯
好打極有限。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
