【now.com】曾經，我係一個好固執嘅人，覺得呢個世界只有黑白兩色，灰色係懦弱無能，根本唔應該喺呢個世界出現。
年青時候嘅我，職場生涯行得唔係幾順，可能性格內向，唔識同同事搞好人際關係。賭錢必輸，所以我唔會同同事打牌；飲一啖酒都會醉，所以我唔會同同事Happy Hour；我冇錢，請唔到同事食下午茶。
我曾經天真到以為做好自己本份就得，上司交帶嘅工作我做好，客戶嘅投訴我跟進得妥妥當當，以為默默耕耘將來必有回報，相信成功嘅重點係能幹，點知能幹嘅結局係被人幹。
我曾經喺一個細屋苑做物業主任，因為資源問題，好多時候都係一腳踢，雖然忙到冇停手，但對於我嚟講唔係一個大問題，因為每一次工作都係學習嘅機會。有一次，屋苑要搞節日活動，經理俾$10,000我，叫我幫屋苑做個節日嘉年華。
我一睇已經覺得唔對路，舞台佈置、表演、攤位遊戲禮物仲有小食，一萬元預算係冇可能完成，我同經理反映問題，經理就叫我諗掂佢，再唔係就刪減表演，或者係選擇一啲平靚正嘅食物去平衡開支。
就係咁，我四圍搵人贊助活動、禮物，表演就搵啲屋苑住客幫手，喺好勉強嘅情況下先至完成到個嘉年華。我以為經理會讚我兩句，點知經理就話個活動做得唔好，感覺好寒酸，仲質問我點解唔叫佢提高預算，話早知活動搞成咁，一定會外判俾人做。
呢個世界，上司最叻就係得把口夾事後孔明，我自問喺呢個預算下已經做足一百分，問上司提高預算佢話冇，問上司工作方向佢話冇問題照做，既然係咁，點解而家講到係我辦事能力有問題。
呢份工，我好快冇做，因為我知道呢啲上司跟著佢唔會再有運行。
自此，我領悟到一個道理。
「欲加之罪，何患無辭」上司要彈個波俾自己，作為下屬根本一啲反抗能力都冇，年青時嘅我會選擇辭職作為反抗，只係人到中年，開始知道「球來球往」先係職場生存之道。
Black and White.
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場
