【now.com】《Logan》最近上映，有啲朋友未必熟悉Marvel歷史，
但都好喜歡「狼人」呢個角色。
當然，好大因素係Hugh Jackman演得實在太型，令人留下深刻印象。
但身為男人，除咗Hugh Jackman之外，更大原因是「狼人」呢個角色太動人。
每個人都會脆弱、
但男仔嘅脆弱，總係帶一份堅強。
覺得自己唔可以示弱，不斷強化自己，但表面嘅強，只襯托內心深處嘅弱。
狼人呢個角色，1975年面世，雖然定位係要角。
但喺異能者雲集嘅Marvel世界，佢並唔算超強。
對比咩冰人、靈鳥、磁力王、雷神Thor、Hulk等等，
狼人絕非無敵。
但佢擁有觸動到所有男性嘅「過去」；
狼人嘅異能自癒，令老化延遲，
所以佢比一般人都老、比一般人都長命、比一般人都多過去，
同時比一般人少朋友。
眾所周知，佢被瘋狂當成活體實驗品，全身變成亞德曼金屬強化骨骼，
並失去記憶。
夜闌人靜，佢總會孤身一人，喺酒吧呆坐。
死唔去，但知道自己名字嘅人，卻寥寥可數。
呢種人生，令佢有一份獨特嘅淒滄感。
另外狼人雖然長命，但愛過嘅人唔多，至少比一般香港人都少，
大家最熟悉嘅係「靈鳥」，
作者為狼人開咗一個玩笑，靈鳥心中已經有鐳射眼。
有個畫面，呢世都會記得，
小學時電視有套卡通《X-MEN》，有幕係講靈鳥同鐳射眼訂婚，
中途狼人踩場，伸出利爪，一幕阿牛式嘅搶新娘似乎要上演。
但原來佢只係默默走向訂婚蛋糕，將佢切開，
再同靈鳥講：「祝你幸福。」
然後轉身，無聲離開。
唏噓、無奈、掙扎、寂寞同痛苦，
每位男性成長所蘊含嘅嘢，全部都係盧根身上搵到。
由無情孤獨，到最後遇到同伴，恢復對人嘅情感......
佢係Hero，但行為往往有種反英雄嘅感覺，
複雜而真實，雖為動漫角色，但人味無限。
難怪，
當佢拎起杯威士忌嘅時候，我哋都約莫知道係咩味道。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
