【now.com】有日一個媽媽帶住個五六歲嘅仔嚟到診所。
當日係大家姐做登記⋯⋯我負責喺藥房⋯⋯
媽媽登記後,拖住阿仔坐埋一邊。
阿仔唔知點解突然樹熊上身抱住媽媽,大概摸到媽媽嘅肚,佢就問:「媽咪,點解你呢度咁多肉㗎?」
媽媽冇佢咁好氣:「生咗你之後咪變成咁囉。」
仔搓吓媽媽嘅肚:「原來係我嘅!」
仔仔跳落地下跑左跑右跑前跑後,邊跑邊叫囂!
大家姐行埋去,「碰!」
仔仔入咗大家姐嘅懷抱了⋯⋯居高臨下嘅大家姐問:「你冇事嗎?唔好周圍跑啦,返埋去坐定定等見醫生啦!」
仔仔面青青行返去媽媽度。媽媽:「係咪衰呢!俾人話啦,叫咗你唔好咁百厭啦⋯⋯」
仔:「媽咪呀⋯⋯」
媽媽:「做乜呀?」
仔望住大家姐:「嗰個⋯⋯」
媽:「嗯?」
仔:「佢嗰度多肉過你好多⋯⋯我頭先撞到佢⋯⋯好淋㗎⋯⋯」
媽媽望望大家姐,大家姐其實一直都望住佢哋。
媽媽吞吞口水,同仔講:「唔好亂講嘢啦!」
仔繼續童言無忌:「媽咪呀?佢係咪入面都收埋咗好多個人呀?」
媽媽低頭唔出聲,搖搖仔嘅大脾:「噓,靜啲啦!」
仔永不放棄:「媽咪呀?佢入面係咪都有好多小朋友呀?」
大家姐行過去,踎低望住仔仔,好溫柔咁講:「我呢啲叫豐滿!」
媽媽又吞口水,尷尬的笑:「係呀係呀,仔,唔好再講啦!」
仔望住踎低嘅大家姐:「媽咪⋯⋯有個小朋友咇咗岀嚟呀⋯⋯」
媽媽望住仔仔望住嘅視線⋯⋯腰⋯⋯媽冇岀聲⋯⋯大家都好安靜。
大家姐安靜地咁行入嚟搵我:「你岀返去登記呀!我唔做呀!」
大家姐嫌我行得慢,喝我:「行啦!係咪肥得滯唔願郁呀?」
我有行㗎⋯⋯我嗰日全日都好唔平安,全日都踩地雷,炸完腳又炸手,炸到冇忽好肉。
我無辜㗎⋯⋯
文:寶豬姑娘
(中女珍寶豬,任職診所助護超過十年,經常使用逆向思維參透世事,包括……細閱大家姐。)
FB:https://www.facebook.com/jumbopig14
〈豬事八卦〉逢周三刊登
專欄屬作者個人意見,不代表本網立場