【now.com】Mary有日同我訴苦：「男朋友𠵱家成半粒鐘先覆我⋯⋯」
我講：「半粒鐘啫。」
佢話：「半粒鐘喎。」
之後嘅對話都唔使詳細說明，
不外乎「追我嗰時勁快覆，一起身就話我知」、「呢家又短（I mean啲Msg），Emoji嚟嚟去去都係笑喊，連Gd nite都唔講呀佢！」
我表明點頭，但心中暗暗一句：「好正常啫⋯⋯」
好多人都擔心，當回覆由「1秒」，到「1分鐘」再變「1小時」，
就係戀愛變奏嘅預告。
之但係，我哋都大個，亦明白，
即使幾夾都好，亦冇可能長期秒秒「bilibala」，分享足廿四粒鐘。
秒回係一種熱戀嘅激動；
慢覆係一樣維繫嘅共識。
慢覆只係畀段關係有喘息嘅空間。
以前覺得兩個人吃飯，
如果冇咩嘢講感覺好疏離，
所以我點都博命搵嘢講，唔想有一秒嘅Dead Air
由於個口未停過，搞到連食嘢嘅時間都冇。
對方講咗一句：「靜咪靜囉。又唔係朋友聚會，我哋兩個人，唔應該怕尷尬呀。你快啲食嘢啦。」
擺落WhatsApp都一樣，
快覆係開心；
但唔介意佢慢覆係另一種甜蜜。
冇秒回只係放慢腳步。
風景轉得慢啲，但條路就行得耐啲。
同埋你好清楚，只要你扭下計，短暫地飾演「港女」嘅角色，
同佢講「你呢排勁遲覆我囉。」
佢都會識做，做返個「快覆手」。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
