【now.com】鄭少秋（秋官）為慶祝入行50周年，宣布將於5月28、29日舉行《鄭少秋半世紀大時代世界巡迴演唱會》，今日更公布演唱會宣傳海報的相片等。秋官更指原來早前多份報章更出現的一個「蟹出沒注意」神秘廣告，亦是秋官的宣傳策略之一。
演出角色「丁蟹」深入民心的秋官，過去都是股市熊市指標，今次適逢5月開騷，秋官就反而睇好後市：「你哋以往都話，逢係我嘅演出，股票都會跌，但今次就唔同嘞，係升，但你哋記得嚟捧我場先會升㗎喎！」秋官又為演唱會拍攝宣傳海報，造型師為他安排了兩套西裝，襯上一副電視框太陽眼鏡，型格十足，秋官又於鏡頭前大擺調皮甫士，充滿活力，就連工作人員都大讚某些角度似郭富城（城城），秋官話：「影出嚟我後生過佢（城城），但跳舞就跳唔到，冇佢咁勁，大家氹我開心話我似城城啫，最緊要相片效果好睇、靚仔、有型、有現代感。」
秋官又話自己已經開始為演唱會努力keep fit，每星期至少有三天做四十五分鐘帶氧運動。提到會否找囡囡鄭欣宜做嘉賓，齊齊唱大熱歌曲《女神》，秋官笑說：「哈哈！我點識唱《女神》呀，但我要同佢唱片公司溝通，因為欣宜有自己經理人，做爸爸都要從正常途徑申請。」
鄭少秋早前為個唱拍攝宣傳海報，大擺多個Chok爆甫士。
在旁的工作人員又大讚秋官Chok過城城！
