【now.com】有日，一位媽媽帶住個約十歲嘅小朋友嚟到診所。
媽媽行嚟登記處登記，小朋友就坐咗喺櫈上等媽媽～我一路等媽媽拎覆診卡岀嚟，一路望到個小朋友用食指喺鼻孔度翻騰打轉瘋狂的挖呀挖呀挖～挖一輪就將食指拔出望望，再將挖出物沾上櫈邊⋯⋯
我拎岀紙巾同媽媽講：「我諗你小朋友需要紙巾啊」
媽媽擰轉頭望吓個仔，畫面仍然係挖呀挖呀挖呀，我預期嘅事會係一個溫柔賢淑嘅媽媽拎住紙巾行去小朋友面前，溫柔的說「唔好再撩鼻屎啦，咁撩法會流鼻血會損㗎」
點知現實係媽媽向我發火，掟張覆診卡俾我：「佢細路嚟㗎咋！你做乜話我個仔呀？」
冤枉呀大人，我幾時有話你個仔～
我：「我見佢⋯⋯」
媽媽都等唔到我講完就一輪咀發火：「而家佢影響到你咩？佢撩你個窿咩？關你咩事呀？輪都唔輪到你教訓我個仔啦！你好得閒呀？唔駛做㗎？淨係理人哋啲嘢㗎？佢撩到你掂到你咩？細路嚟咋嘛！控制唔到自己有乜咁岀奇呀？你唔會撩鼻屎㗎話？定係你第一次見人撩鼻屎呀？」
我好辛苦先搵到佢個回氣位：「佢掂落張櫈……」
佢又成功回氣：「乜嘢櫈呀？佢咪坐住囉！佢都冇四圍跑！淨係坐喺度啫！佢咁樣你都唔順眼呀？你唔好做啦！你辭職啦！冇愛心嘅就唔好喺度啦！仲坐喺度？我嗌你走呀！」
同事拍拍我膊頭，叫我返入藥房抖抖先。
媽媽一路望住我走，一路向我同事講：「一個細路嚟咋嘛，咁都要啄住佢，真係離哂譜。細路咋喎，你話係咪啦？而家你有寫明唔俾喺度撩鼻屎㗎咩？細路邊控制到自己呀？」
最需要控制自己嘅，係媽媽你啊～
文：寶豬姑娘
（中女珍寶豬，任職診所助護超過十年，經常使用逆向思維參透世事，包括⋯細閱大家姐。
FB： https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場。
