【now.com】必需承認，做老闆唔一定醒，做下屬未必會差過上司。
我成日講嘅一句說話就係「讀書講書緣，工作講際遇」，好多人明明無料但會做你上司，又有好多人明明比其他人聰明，卻喺職場上面屈屈不得志。人生在世，要學習嘅事實在太多，就算喺一個行業有二十年經驗都好，好多知識技術都未必全部會識，所以我認為做人做事，每日都應該虛心學習，而唔係以為上司講嘅說話就一定啱晒。
特別係創作行業，年青人嘅創作思維比老屎忽有時候更貼地氣，更具前瞻性。
我曾經做過室內設計，好自然對於自己嘅創作同顏色配合有一定信心，而我為唔同客戶設計新屋都備受好評，所以對於自己嘅創作都有一定信心。沙士時候，百業蕭條，好不容易咁搵到個大客話要將成座村屋翻新，老闆聽到之後就話呢單生意要全體同事支持，不容有失。
之後我同個客開過幾次會，亦都實地視察過客人嘅居所。客人講咗佢嘅要求俾我知，就係設計一定要簡約，而且必定要有視像圖俾佢確定設計先會俾錢簽合約。
做創作嘅人必定知道，所謂嘅創作好多時候只係依據客人抽象嘅說話同意見整合張圖出嚟，而之後就要俾老闆或者上司改三五七次先可以確認張圖，所以呢個階段可以話係最浪費時間嘅程序。
我依據客人嘅指示好辛苦咁完成張圖，但老闆見到之後就話呢樣唔好嗰樣唔好，話佢「估」客人嘅要求應該係咁咁咁，其實我一開始聽到已經知道老闆嘅Idea係八十年代裝修設計，除咗唔符合客人嘅要求外，個設計直情係Outdate到極點，我整好攞出嚟都驚俾人笑。
我向老闆講出我嘅意見，但老闆一意孤行，作為打工仔我亦都無謂再同老闆爭拗而依老闆嘅指示修改。老闆睇完張圖就話：「嗱！我一早都話我嘅設計係好，你哋睇下間屋幾光猛，設計幾咁新潮！」
個客睇完張圖之後，我就再聯絡唔到佢，為怕傷到老闆既自尊心，我亦作個借口同老闆講個客屋企有事，所以工程擱置。
好多時老闆話自己點醒點勁，其實佢哋唔係真係咁醒，只因為佢哋係老闆，冇人夠膽Ban佢哋。
但好多時打工仔夠膽講，老闆又係咪肯聽？
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
