【now.com】職場，係一個人來人往嘅地方。
有人話「每個人都係公司嘅齒輪，缺一不可」，
但亦有一句「公司唔會冇咗邊個唔得！」。
大家都口說前者，但心信後者。
所以大家都各奔前程，每隔一段時間，就收到散水餅，再出席一餐Welcome Lunch。
但有一種人，好特別。喺公司嘅時候，佢嘅存在唔顯眼，
唔鍾意大聲叫嚷、唔鍾意聯群結隊、唔會巴結上司、唔識擦鞋。
喺WhatsApp大Group，甚至不發一言。
唔刻意搏取存在感，喺呢個喧鬧嘅辦公室入面，就彷似唔存在。
你返工時佢已經坐喺度，
你走時都冇留意佢枱頭。
有一日，佢同你講：「今日我Last Day啦，買咗啲西餅畀大家食。」
你覺得，平時都留意唔到佢，冇咗佢都冇所謂，
於是擺出一副公式嘅笑瞼，吐出一句：「祝你好運呀！」
然後又係平淡嘅一日，佢嘅離開冇引起騷動，亦只有少量嘅閃光燈。
你唔知佢幾時走咗，不過枱頭已經清空。
但奇怪嘅事係之後幾日發生，佢嘅「名字」出現頻率激增。
「單嘢之前阿邊個跟開喎」、「阿邊個最熟，哎呀係喎，佢辭咗職」、「平時阿邊個會幫手做埋，咁𠵱家邊個頂」。
阿邊個阿邊個阿邊個。
佢存在嘅時候，同事們口中冇提起佢，反而到離開咗先被人記得。
令你返工時，都不其意望吓佢個位，放工時，都睇吓佢枱頭。
只係，佢的確已經離開咗，唔會再返嚟。
估唔到佢嘅默默耕耘，喺離開公司後先開花結果。
你同同事閒聊，覺得佢太蠢，既然對公司咁重要，緊係留低搏升。
同事笑一笑，話你太天真，佢話呢種人，
只要存在就唔會重要，大約離開了才會存在。
我諗一諗都明白，太低調，都係一個弱點。
辦公室之內，伯樂少之有少，知音亦碩果僅存。
所謂嘅工作表現，有時都係一種「工作表演」。
需要耍耍手段，畀人知你勞苦，令人感覺功高。
一個離開咗先有存在感嘅員工，代表佢嘅能力，
亦同時代表咗「冇人了解佢嘅能力」。
人到死咗先追授勳章絕無意義，可惜呢個已經係佢唯一嘅實力證明。
返回公司，聽到另一位同事喺度吵鬧，呻辛苦，再拎起一份厚禮，打算討好老闆。你就明白，
有種員工，大約離開了才存在。
但亦有種員工，大約要離開了，你才驚醒，他的存在根本不重要。
你再擺出一副公式嘅笑瞼，祝自己好運。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
