【now.com】地鐵嘅關愛座，將會由每卡2個變成4個。
港鐵話係宣揚讓座，
其實只會演變成宣揚「後生有手有腳就咪坐」。
大家都知，關愛座就係一個道德高地，
如果你唔係老到髮如雪或者個肚大到突出嚟，
而又要坐落去，就要準備一場道德審判。
呢場道德審判有內有外，內就車廂嘅人心底對你冷笑幾聲；外就影相拍片網上見。
「大佬，搭個地鐵啫，使唔使咁複雜呀！」
偏偏就係愈來愈複雜。
根本上，未有關愛座嘅時候香港人都識讓座，仲讓得好自然吓。
可能你會問「唔係呀！以前試過有人唔讓畀我喎！」
咁個城市治安更好，都總有人鍾意打家劫舍嘅，恰巧撞著剛剛啫。
平時返工返學，個靈魂已經冇咗110%（以上），我真係冇晒心力去玩讓座遊戲，所以基本上我都已經變成一個「不坐男」。
而從前嘅「自發式有需要讓座」都變成「鬥快讓座」。
經常發生嘅係你想關愛老伯，老伯又覺得自己身體OK，禮貌拒愛，一個被愛；一個避愛，大家由柴灣尷尬到中環，留下一個冇人敢坐嘅關愛座。
不如咁啦，大家唔好估嚟估去，你個關愛座就Exactly講明屬於幾多歲嘅人士，講明咩身體情況可以坐，另外你有4個「關愛座」，矛問題！但唔該開返兩個「青年座」，年輕人先坐得。
咩呀，呢家年輕人就唔使被關愛呀？老人家係生理嘅疲勞，後生係心理嘅疲勞，日日做十幾粒鐘，要諗錢諗前途諗屋企，好好地返屋企有位唔敢坐，其實好崩潰㗎個人！
需知道，「關愛座」係很美好很大愛的，不過我哋一介凡人，實在不知道「愛與被愛」的關係，
所以，與其估估吓，不如明碼實價。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
