【now.com】權力令人腐敗,更加會令人格扭曲。
做咗管理層之後就會發現喺人事上面,每落一個決定或者決策都會對同事帶嚟實際性嘅影響,簡單如年尾嘅薪酬調整,加多加少會影響同事收入,出警告信就會影響同事嘅工作記錄。
我成日講,上司下屬都好,其實大家都係打工仔,求財唔係求氣,所以對於同事我一直都比較寬鬆,只要完成到手頭上嘅工作,其實我都唔太理佢哋。
人係有惰性,我亦都唔例外。有時候屋企有事會同同事講聲要早退,返工有時候遲起身會遲到。呢個世界冇人完美到會唔遲到早退或者做錯嘢,所以我覺得喺可行嘅情況下,同事間互相遷就,咁樣辦公室嘅工作氣氛先會好,同事先會做得開心。
偏偏,呢個世界有啲所謂嘅管理層最鍾意就係寬己嚴人,自己返工日日遲到個幾兩個鐘,有時候就成個上午都唔見人話去開會,其實自己根本上就係懶唔知醒。
以前啱啱出嚟社會做事,正正俾我遇上呢種懶到出汁嘅經理,不過當時嘅我覺得冇乜所謂,打工仔嚟講,上司唔喺公司其實仲開心,啲野慢慢做又得,食埋個早餐先做亦得。
點知,經理轉頭就攞住張出勤記錄同我講,問我點解返工遲到一分鐘,話咁做對其他準時返工嘅同事唔公平,而且亦會破壞公司嘅員工守則,話我再唔改善嘅話,就會向我發出警告信。
呢啲說話如果出自一個律已嚴人嘅經理,我可以話係心服口服,仲會反思自己點解返工會遲到一分鐘咁多,偏偏呢個經理操行差過自己,聽落去就點都唔服。
我仲記得有個同事反問個經理:「你自己都遲咁多啦!有咩資格管我哋?」
經理聽到臉紅耳赤,谷到想爆咁話:「我……我唔係遲到,我係去開會!」
同事冷笑一聲回道:「咁遲啲等你唔駛出去開會,我哋咪準時返工囉!」
往後日子,我引以為鑑,提示自己想責罵同事嘅時候,先要諗自己有冇犯同一個錯誤,想公司同事守規則首先要身先士卒,用身教去樹立一個正確榜樣,咁樣同事先會口服心服。
職場上面最乞人憎嘅人,叫寬己嚴人。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。