【now.com】「唔想OT？唔想通宵做？點解你哋班後生仔返工咁冇士氣㗎？吓？」
呢句係真實對白，嚟自我老死阿強。
話說佢返咗份新工，有啲新Project，成Team人都比較年輕。
自自然然，上面就有個老屎忽。
當時情況好危急，老闆有份Proposal想即日準備好，
而佢喺下午6點提出呢個要求。
老闆都有呢個通病，
總係鍾意喺你望到終點之際，拉你返起點。
老屎忽收到命令再轉發畀阿強，已經係6:30pm
阿強其實都抵得諗，試下盡全力，冇Say No，入Pantry整個杯麵，食住開工。
9:30pm，佢投降。
因為佢知道，係冇可能今日做完。
最重要係老闆8:30pm已經閃咗，
咁佢既然閃得，份嘢都唔預收到㗎啦，Right？
之後佢同老屎忽交代進度去到邊，提議聽日趕起佢。
誰知就換嚟老屎忽碌大雙眼（嗰個Moment你會覺得世界係唔再需要大眼Con），講出一句：
「因為唔想OT？因為唔想通宵做？點解你哋班後生仔返工咁冇士氣㗎？吓？」
首先，阿強已經O咗T㗎啦，正確形容係「仲O緊T」，
總有啲職場癲佬，喜愛即場發癲，覺得「我放工之後你未放工先叫OT！」
哇，如果你日日喺公司瞓而我收6點，咁我係咪當早退呀？
佢哋都喪喪哋！
同士咩Q嘢氣啫，
你畀幾多人工我咪幾多士氣囉，大家成年人，知咩叫Fair Trade㗎嘛。
但老屎忽是不懂的。
佢之後再講多一句：「你有時間食杯麵，但係話冇時間做份嘢？」
阿強同我講如果佢EQ稍為低少少，
應該都一下「天馬流星拳」打到佢半身不遂為止。
即係一個員工喺夜晚食嘢，係咪咁不可思議呢？
佢又唔係走落去四季嘆中菜，
食個合味道啫，唔使咁講嘢下話。
若然佢唔食嘢同你做天光，你得到嘅唔係士氣，分分鐘係一具屍體。會死人㗎大佬!
但有時老屎忽嗰種Mean法係冇咩人性。
我只係估唔到「OT等於士氣」呢種思想仲依然存在，
但我又反思下，自己有時都會咁諗啲同事。
或者呢種思想係會傳染，一代傳一代。
20年後，到我成為人哋眼中嘅老屎忽時就會發作，去篤啲後生仔怪佢唔OT。
所以為咗杜絕呢種思想，有時我見公司同事仔準時走，心底裡其實暗暗有啲不滿，但隨即同自己講：「你咪痴線呀！」
呢個時候同事仔問我：「仲有冇嘢要幫手？」
我就會答：「冇啦，快啲返去抖下啦。」
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
