【now.com】有日,一位姨姨嚟到診所問我:「姑娘,有啲嘢想請教你呀!」
先請而後教!再請就唔教!
我:「嗯?請教嘅嘢……我未夠班啊,最好都係問返醫生~」
佢:「拉屎係點先叫完美?」
你冇睇錯,我冇聽錯,佢真係講『拉屎』而唔係『屙屎』。要點完美呢?係咪要美圖秀秀吓先叫完美?
我:「呢個問題太高深啦……」
佢:「你唔需要拉屎㗎?」
我:「要就要,不過我唔會追求條屎嘅完美。」
佢:「我講嘅完美係屙得乾淨呀!」
我:「用正確姿勢排便嘅話就會好好多㗎啦!」
佢:「我知呀,腳踏矮櫈仔嘛,我有做喎!」
我:「咁應該屙得乾淨啊~」
佢:「姑娘……」
我:「嗯?」
佢:「你會唔會唔介意幫我望吓?」
介意。我好介意。我真係好介意。呢啲嘢唔係我做㗎嘛!
我:「想檢查嘅,我同你登記見醫生啦~」
佢:「你醫生係男定女呀?」
我:「男的。」
佢:「姑娘你做得唔得㗎?」
此時,美麗動人嘅大家姐嚟到我身邊:「係咪要姑娘睇呀?」
佢:「係呀,女人睇會冇咁尷尬嘛。呢度附近又冇女醫生~」
大家姐:「我都係女人,我梗係明白你諗乜啦!」
佢:「我係咪要入嚟俾你睇?」
大家姐:「睇?用肉眼睇就太膚淺啦,淨係睇到個『門口』咋喎。」
佢:「咁要點?」
大家姐:「我個人認為應該至少要用手指伸入去打個圈咁檢查!平時我見醫生都係咁做,不過佢check痔瘡啫,我哋都可以當啲屎係痔瘡咁做!」
佢:「痛唔痛㗎?」
大家姐望望自己雙手:「嗯……應該冇乜痛啩,我啱啱做完gel甲,有啲花喺甲面……不過你放心!我雖然唔係醫生!不過我一定會戴套!手套!」
佢:「gel甲喎……」
大家姐:「打個圈,眨吓眼就過啦,嚟啦,唔好等啦,好心急呀我!」
佢邊講邊走:「都係唔駛啦姑娘,我去搵返女醫生檢查得喇!」
留低套都笠好嘅大家姐:「gel甲有花嘛,咪當凸點囉……」
大佬,你朵朵花都好巨吓……
文:寶豬姑娘
(中女珍寶豬,任職診所助護超過十年,經常使用逆向思維參透世事,包括……細閱大家姐。)
FB:https://www.facebook.com/jumbopig14
〈豬事八卦〉逢周三刊登
專欄屬作者個人意見,不代表本網立場。