【now.com】如果生老病死係人生必經階段，咁辭職喺職場上面就係一個人生嘅新一頁。
一間公司裡面少則數人，多則幾百甚至幾千人都有，要每一個同事做得開心，上下一心團結一致，基本上係冇乜可能，所以我一直認為如果同事搵到份好工而辭職，仲可以升職加薪嘅話，我唔止恭喜佢，仲祝佢步步高陞，事業有成。
要留住好嘅員工其實唔難，有啲管理層或者老闆會安排唔同類型嘅工作、或者係安排一啲重任俾同事去提升佢哋嘅士氣，等佢地覺得學到嘢，備受公司重用，又或者係安排多啲員工聚會，提升同事之間嘅歸屬感。
不過，搞咁多野，其實我覺得最有效嘅留人方法，就係出比其他公司更吸引嘅人工或者福利。
打工仔好簡單，個個都係為錢，又或者係為個好啲嘅職位，等下一次轉工嘅時候可以爭取到更好嘅待遇。每個職位都有個價，老闆付出市場價格以上嘅人工，賞罰分明，論功行賞，同事未必會做成世，但至少一定做三五七年；出市場價格以下人工嘅話，我唔敢講請唔到人，但一定做得唔耐，學完嘢就好快走人。
我曾經喺一間室內設計公司裡面做初級設計師，本來工作都叫做順利，後來同事相繼離職，老闆唔請人就將其他工作交晒俾我跟進，極端時間係一個人做四個人嘅嘢，我同老闆講叫佢請人或者係加人工，點知老闆話：「我俾緊機會你學嘢，你明唔明？」
我唔明，所以第二日我就已經辭職，因為我知道跟住呢啲老闆，我就真係「前途似咁」，付出同收入永遠都不成正比。
一個惡性循環嘅開始就係有人離職，佢嘅工作交俾舊同事，公司因為慳錢唔請人，舊同事工作太多頂唔順辭職，新人入職一時間負荷唔到太多工作又辭職，就係咁無限輪迴，工作永遠都做唔好，同事就走馬看燈，浪費公司嘅人力物力。
我同意有人真係會用心同公司拼搏，但大前提係老闆亦都要付出相應嘅人工職位去尊重返個同事。
「我俾機會你學嘢」呢句說話對加辛唔加薪嘅打工仔來講，難聽過粗口。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
