【now.com】出嚟社會做事，除咗工作能力之外，最重要就係謙卑。只有正確嘅人生態度，職場上先可以無往而不利。偏偏呢個世界上最多人自以為是，知少少扮代表，特別係恃才傲物嘅人，對工作團隊最為危險。
幾年前接手一個屋苑，管理處裡面有一個職員好有潛質，佢叫阿明，做事積極進取，有責任感，基本上有咩問題搵佢幫手，佢都會幫你搞掂，好自然獲得高層賞識，升職加薪。
一朝得志，語無倫次。升職後嘅阿明，對於下屬不再包容，只要做錯事就會被佢鬧到狗血淋頭，同事不服同佢理論，佢就出警告信俾同事，實行高壓管治。同事之間怨聲載道，好多人唔服佢而辭職，好地地嘅一個團隊，就係咁俾佢搞散。
當時嘅阿明目中無人，即使作為經理嘅我向佢落工作指令，亦唔會得到佢嘅接納，阿明只會依照自己嘅方法做事，因為佢認為只有佢嘅方法，先至係好方法。
我知道，我唔救阿明嘅話，佢嘅前路將會好艱難，我亦唔希望一個有前途嘅年青人，咁快就固步自封，不可一世。
當時屋苑有一個會所，我叫阿明安排興趣班俾住客參與，我問要唔要俾意見佢，阿明話唔駛，仲話呢啲咁簡單嘅事可以輕鬆搞掂。
兩個月後，陸續收到住客投訴。內容為舊生點解冇得優先報名、繁忙時間因為興趣班而搞到其他住客訂唔到場，仲有投訴興趣班導師質素參差，問管理處有冇嚴格挑選承辦商。
見時機成熟，我搵阿明傾一傾興趣班嘅事。阿明話所有問題已經圓滿解決，投訴嘅住客亦都滿意管理處嘅跟進工作，話下個月嘅興趣班唔會再有問題發生。我笑住咁同阿明講，真真正正嘅高手唔係解決問題，而係防止問題發生。
阿明唔服，話我馬後炮當然可以抽水亂講，我攞咗封信出嚟，係我兩個月前安排阿明跟進興趣班嘅時候，暗地裡叫其他俾佢鬧到狗血淋頭嘅同事諗出嚟嘅，裡面列出興趣班將會遇見到嘅問題，同最近住客嘅投訴不謀而合。
阿明睇完封信之後冇再出聲，佢嘅氣焰亦隨即收歛，我同佢講做人做事都唔可以目中無人，亦唔應該恃才傲物，以為自己嘅決定同講嘅嘢就啱晒，其實呢個世界有好多人嘅經驗同故事係值得人學習同參考。
「三個臭皮匠，勝過一個諸葛亮」呢句說話細細個已經聽，偏偏到咗呢個年紀仲係有人唔明。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
