【now.com】不知不覺，我哋都變咗工作上嘅奴隸。
坦白講，為工作搏命我覺得冇咩問題，
反正9成香港人都做緊呢件事。
生命價值嘅嘢，工作的確有啲成就感，唔出奇。
不過有時，我哋所承受嘅嘢已經唔係搏命返工咁簡單，
而係寧願冇咗條命，都唔想做再返工。
咁諗的話，你心理上應該出咗事。
我都試過一次，
有啲嘢星期一必定要有定案，但去到星期日，所有單位都未有回覆。
我過馬路嘅時候，突然萌生一個念頭。
「不如衝出去畀架車撞...」
因為我覺得，如果係意外受傷(前題當然係唔死得啦)，
瞓喺醫院，就唔使再理公事，但又情有可願，真係萬全之策。
真係差少少衝咗出去...好在僅存嘅理智捉返住我，
令我不禁嘆一句：「打份工啫，唔使畀車撞咁大鑊下化！」
可惜，都市人都暗藏呢種病態。
星期日嘅晚上，我無數次希望聽日就世界末日，大家咩都唔理，各自逃生。
原因唔係想做「救世英雄」，只係「唔想返工」。
的確好弱智，但或者你都有咁諗過。
一個「希望世界末日而唔使返工」嘅人，生活又會開心得去邊呢？
係嘅，事業上會有成功感，
而同時之間，都會喺某啲時間帶嚟絕望。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
