【now.com】三十幾歲人，做過文員、侍應、單車維修員、電話推銷員、救生員、外遊領隊等唔同行業，識嘅同事冇一千都有幾百。
十幾年過去，見證有啲人撈到風山水起，有啲人一窮二百，點都好，我成日都講，條路點行係自己決定，其他人根本就冇資格說三道四。不過，唔難發現，大多數事業無成嘅人都有一個共通點，就係充斥住負面情緒，稱之謂「負能樣」。
「負能樣」又唔同「負能量」。負能量嘅人基本上對自己冇信心，覺得自己係零，咩都做唔好。有時候，只要俾多啲關懷佢地，安排一啲合適嘅工作，佢哋可以好快充滿返自信。
負能樣就唔同，呢種人無時無刻都喺度怨，彷彿一生出嚟人生就已經係倫常悲劇。佢哋會怨公司制度唔好、付出同收穫不成正比、返工俾同事排擠，又或者係自己明明好醒，但係跟住個蠢鈍經理，搞到自己嘅能力冇得發揮。
佢地特別喜歡喺社交網站發表偉論，講一兩句似是而非嘅說話，去獲得所謂嘅朋友安慰，獲得那虛擬嘅共鳴。
早幾日，公司安排咗我去其他屋苑做internal audit，視察其他屋苑有冇跟足公司指示去做管理工作，行咗屋苑一陣，就俾我遇到舊同事阿基，大家少不免寒喧幾句。
我：「點呀？呢度好唔好做呀？」
基：「唔好！呢度做事冇system，經理又卸膊！」
我：「唔緊要啦！出來打工，最緊要做得開心。」
基：「緊係唔開心啦！啲同事個個都傻㗎，成日做錯嘢，教幾次都唔明！」
我：「做得唔開心咪走囉，東家唔打打西家。」
基：「係囉，我咁有經驗，你個盤有冇空缺？不如我申請調過嚟幫你手！」
我：「哈哈！我邊請得你起呀，我做嘢先，遲啲再傾！」
講完，走夾唔抖！
阿基正正係負能樣嘅代表，十年前我同佢一齊做物業助理，十年後我已經係一個物業經理，而佢依然都仲係一個物業助理。呢十年裡面基本上佢日日無病呻吟，喺社交網站數盡公司壞話，話同事無能，老闆弱智，說實話，睇得多我都unfriend咗佢，怕俾佢影響自己心智。
識人好過識字，一份荀工往往係由朋友介紹。根據非正式統計，十個負能樣，十個都冇人會為佢哋介紹荀工。
怨，就輸一世！
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
