【now.com】今日係咩日子？普通人未必知，但係為食嘅你就一定知！朱古力品牌GODIVA今日起一連3日推出軟雪糕買一送一優惠，放lunch時間當然大排長龍，估唔到連正常返工時間一樣咁多人排隊！
本網記者下午4時就到灣仔一間分店直擊現場情況，到達時已有20多名市民在排隊，人龍移動得非常緩慢，因為分店只得一部雪糕機，每製造4杯軟雪糕，就要等10－15分鐘才能造出第二輪雪糕，結果記者排足一小時15分鐘才成功買到兩杯軟雪糕。
該分店職員表示，今日一開店已做到冇停手，午飯時間人龍最長，接近300米！她又指雪糕機不勝負荷：「其實平時大約一次可以整十幾杯雪糕，不過今日完全冇畀部機抖過，我地係咁倒漿落去，根本冷凍唔切，而家每次只可以整4杯，就要等十分鐘左右先再整到第二轉。」
她們表示今日結束營業後會向公司反映情況，可能會加設告示板向排隊市民解釋輪候情況，但她感激市民的耐心等候：「排隊嗰時大家都好願意等，唔會鼓噪，不過有啲都會等唔切，排排吓走咗。」
有得排、有得食算好喇！唔少市民就上GODIVA facebook投訴，有人指海港城分店不時截人龍趕客，朗豪坊分店直情壞機，想排隊都冇得你食。今次優惠期仲有兩日，未知GODIVA今晚會否好好商討對策，以免引發另一場公關災難。
下午4時某灣仔分店的人龍有20多人，到4時半已多一倍人。
呢間分店有分流，一邊畀錢，一邊等拎雪糕。
雖然做到冇停手，不過GODIVA姐姐依然好好服務態度。
買到喇買到喇！如果早知要等95分鐘，我寧可留番平時用正價買喇...
買唔到雪糕的網民上GODIVA facebook投訴，海港城主要問題係截人龍。（facebook截圖）
朗豪坊分店直情壞埋機。（facebook截圖）
其實有市民於優惠期開始前已經提醒GODIVA要做好準備。（facebook截圖）
就係呢個買一送一優惠囉～
採、攝：何愫盈
