【now.com】夏日炎炎,可以食杯雪糕絕對係一級享受。平時大家食雪糕食慣什麼口味?朱古力?雲喱拿?士多啤梨?有時食來食去都是大路的幾款有點悶?石硤尾南山邨有一家雪糕店,一次過提供28種味,任君選擇。單球售$6,連甜筒$7,雙球$11,絕對係街坊價,但是有帝王式的選擇。
街坊稱「南山雪糕」的超級雪糕屋「C+屋」,開業已經五年,最近遷到「街尾」,讓大家更易找到。28種口味的雪糕並不是什麼奇怪的地獄味,每款都一定聽過、睇過,唔會中伏。而老闆都好俾心機為每一款改名,以當中的「奧巴馬朱古力」為例,原先只叫作「奧巴馬」,因為老闆想顧客吃甜品前都要動動腦筋,認真鬼馬。記者試了芒果、荔枝及榴櫣,芒果雪糕中帶有椰果,口感豐富。荔枝味亦出色,奶味與荔枝味配搭得十分合宜,質感幼滑。而三款中,記者最欣賞榴櫣味,雖然沒有果肉,但勝在不太甜,沒有奪走濃郁的果香。另外亦特別推介香蕉朱古力,雪芭的口感,配上粒粒棉花糖,正!甘香的蕃薯味亦是必食之選。
細看一下,其實他們賣的都是大品牌的雪糕,但老闆娘指他們有獨門秘方,令雪糕更好味。一,雪糕櫃的溫度,老闆娘指他們不會因為想易處理雪糕而特登調高雪糕櫃溫度,要為顧客保持口感,寧願自己出多點力搯硬雪糕。記者光顧當日,老闆剛巧不在,老闆娘要用九牛二虎之力先搯到雪糕,不過雪糕又未見有冰,雪糕櫃溫度真的有其巧妙之處。二,雪糕勺,原來此也有學問,要不太鋒利又不太鈍才可以搯出靚雪糕球。老闆娘更表示有時雪糕剛剛運抵,有客想買都唔會賣,因為一定要雪番好,唔想食到人肚痛。雪糕勺每兩小時亦會消毒,確保衛生。
在南山邨吃著雪糕,看著老闆與鄰舖的婆婆談天、熟客的光顧,加上他們賣雪糕的熱誠,相信「C+屋」有販賣第29種味-人情味。
「C+屋」
地址:石硤尾大坑東道111號南山邨南豐平台商場
營業時間:中午12至晚上7時(星期日休息)