【A&M Diary】越南菜嘅主廚嚟自越南當然唔出奇，但位於旺角嘅Pho Home，唔少店員都係嚟自越南，就相對少見喇！主廚喺幕後，自家製作驚喜嘅骨湯湯底同撈檬醬汁，將越南嘅傳統味道帶到嚟香港，而幕前嘅店員亦向我哋推介越南嘅菜式，甚至地道嘅食法，令呢餐越南菜毫無違和感，傳統又地道嘅體驗，真係無諗過我其實喺旺角呢！
越式手打炸蝦餅、香茅雞翼
午餐嘅小食前菜，就揀咗越式手打炸蝦餅同香茅雞翼喇。香茅雞翼即叫即炸，夠晒熱辣辣，酥脆可口；越式手打炸蝦餅非常彈牙，蝦味濃郁，加埋甜酸醬一齊食就更滋味。
越式撈檬配豬頸肉
大量嘅豬頸肉舖滿喺檬粉上面，份量十足又抵食。烤過嘅豬頸肉有一層薄而脆嘅燶邊，肉質軟腍帶有濃濃嘅肉味；而撈檬嘅魚露更加係餐廳自家製，微酸醒胃，夠晒清新。
