【A&M Diary】講到香港地道特色，又點少得周星馳呢！周星馳嘅電影有唔少經典場面同琅琅上口嘅對白，其中《唐伯虎點秋香》可以話係當中嘅代表呢！而位於屯門嘅秋香，相信店主亦係該電影嘅擁躉，因為餐廳設計有唔少電影嘅元素，食物飲品亦以此命名，極具創意；而看似日式嘅居酒屋，其實都有唔少地道元素，出品高質，令我哋都諗起當中嘅經典對白：賞花賞月賞屯門秋香。
日本厚切黑豚肉、澳洲和牛牛舌芯
秋香係一間居酒屋，所以又點少得串燒呢！日本厚切黑豚肉嘅賣點犯一層肥一層瘦，油香而不膩；而澳洲和牛牛舌芯嘅牛肉味香濃，肉質軟糯彈牙，舌芯位真係無得輸。
自家製免治雞肉棒
免治雞肉混入雞軟骨碎，加上生雞蛋醬油，口感同味道同樣極具層次。
秘製蛋黃醬燒蠔
蠔肉鮮甜滑溜，加上店主秘製嘅蛋黃醬，令味道大大提升，齒頰留香。
紫醉金迷
甜品就揀咗加上藍莓、百利甜酒、金箔以及沙巴翁醬嘅班戟，絕對係名副其實嘅「紫醉金迷」！鬆軟嘅班戟充滿蛋香味，口感順滑而帶有空氣感。
一日冚包散-華夫人、賞花賞月賞-秋香
以威士忌作基酒嘅一日冚包散-華夫人，混合柚子氣泡酒，加上一層厚厚嘅玄米茶奶蓋，再灑上紅菜頭粉，入口清新，酒味唔算太濃；至於賞花賞月賞-秋香則用上冧酒作基酒，加上巨峰和紫蘇作陪襯，味道清甜，同樣適合唔太喜歡太濃酒味嘅選擇。
