【Now.com】Adobe 宣布即將喺 Photoshop 推出一項名為「即時協同編輯」嘅新功能，畀多個用戶同時檢視、編輯同一文件。呢個概念類似大家一齊處理 Google Doc、Sheet，只係Photoshop呢個platform就用喺照片或圖形編輯。
小編睇到呢個新功能消息，即刻覺得好啱自己工作用！Designers或者時下新聞網編，經常要自己整埋圖砌埋 Thumbnails 出 post，有時齋靠從旁講解指導同事，不及直接落手製作示範更有效，不過下下要走去同事座位示範，唔符合現今跨地域數碼世界潮流。
根據 Adobe 嘅新聞稿，「即時協同編輯」可應用到多種情境。例如，當設計團隊需要同時處理一個包含多個 elements 嘅大型項目時，呢個功能特別有用。另外，亦可以用喺老師向學生講解特定操作流程，或者喺會上向客戶demo內容編輯詳情。
要用呢個功能，文件檔案要儲存至 Creative Cloud。如果檔案仲儲存喺電腦，Photoshop 會教 users 將 file上傳至雲端，完成後會生成 .PSDL 格式文件，而唔係傳統嘅 .PSD 格式。
新功能下星期會以私人測試版形式推出，Adobe未公布幾時全面開放畀所有用戶。參與測試嘅用戶需要註冊並通過核准，先可以透過現有嘅共享按鈕啟用呢個功能。推出初期，「即時協同編輯」將適用喺 Photoshop 嘅桌面版及網頁版，不排除未來再擴展到手機版。
Photo / Adobe
