【Now新聞台】快餐店喺香港真係周街都係，但以新加坡菜為主題嘅快餐店又好似真係未見過喎！位於銅鑼灣嘅A.T.A.S就以新加坡菜做主打，連店員都係新加坡人，真係充滿獅城嘅特色。餐廳當然唔少得新加坡嘅地道菜式，而餐廳嘅環境都幾有文青feel，打卡都得架！
辣椒板麵
板麵類似河粉，都係好滑溜，係新加坡嘅其中一樣主食。呢碗辣椒板麵係撈麵食法，材料有流心蛋、炸魚仔、肉碎同滷冬菇，但重點當然係參巴醬辣椒醬啦！以前去新加坡食燒魔鬼魚上面都會放有大量參巴醬辣椒醬，依家放埋落板麵一齊食，真係好惹味架！
麵粉粿湯
唔鍾意食撈麵嘅，我哋就推介麵粉粿湯。粉粿其實係麵糰，通常都係手切，所以粉粿會有唔同形狀，充滿口感。配料同樣有流心蛋、炸魚仔、豬肉丸、蔬菜、滷冬菇等等，湯底唔會太濃，但因為有唔同配料，所以味道有層次。
玫瑰露、蜜糖羅漢果
上枱見到杯粉紅色嘅飲品真係有啲驚，但味道原來唔錯，帶有玫瑰花嘅清香味，而且唔會太甜；至於蜜糖羅漢果就好似飲緊涼茶，非常滋潤。
