【A&M Diary】大排檔小炒風可以話係香港嘅地道美食代表！除咗充滿鑊氣嘅小炒、焦香熱辣嘅煲仔菜之外，當然唔少得嗰種老香港人情味！嚟到沙田圍嘅翠林餐廳，經濟小菜自選套餐嘅價錢仲相當親民，抵食之餘仲有久違嘅大排檔鑊氣呢！
金牌翠林小炒王
經濟小菜自選套餐有26款小菜可供選擇，根據人數選擇2款、3款或4款小菜，選擇多之餘，餸菜嘅份量仲要大大碟呢！嚟到茶餐廳或者大排檔，就一定會叫小炒王。翠林餐廳嘅金牌翠林小炒王，配料唔少得韮菜、蝦乾、魷魚、腰果。份量十足，送飯一流。
沙嗲金菇肥牛煲
打開煲蓋已經聞到沙嗲汁好香，肥牛煮到軟腍又入味，但講到最正，當然係吸收曬沙嗲汁精華嘅粉絲啦，十分惹味。
椒鹽鮮魷
去大牌檔呢種格局嘅飯店食飯，點少得椒鹽鮮魷呢！椒鹽鮮魷炸得好脆口，魷魚充滿口感但完全唔韌，加埋上面配埋d炸蒜粒，香口之餘，口感仲大大提升！
煎蠔餅
煎蠔餅係潮州版本，比較脆口。平時d芫茜只係放係蠔餅上方，而佢地會切碎加係蠔餅入面，更加容易食到芫茜香味。煎蠔餅嘅蛋香十足，而每粒蠔都仍然脹卜卜，無煎到乾曬水呢！
