【A&M Diary】音樂Playlist成日更新，咁你嘅餐廳Eatlist又幾耐無更新呢？嚟到出名多嘢食嘅元朗，但因為自己嘅餐廳Eatlist未更新，次次食嚟食去都係嗰幾間餐廳，就係咁而錯過唔少美食。位於元朗嘅泰發泰國餐廳 ，餐廳出品用心，值得更新你嘅餐廳Eatlist。
泰式生蝦
講起泰式前菜又點少得生蝦呢！泰發嘅泰式生蝦大大隻，仲同平時嘅泰式生蝦大不同，上碟連埋炸過嘅蝦頭，蝦頭內蘊含豐富嘅蝦膏，非常鮮甜；將蝦肉加上自家製嘅泰式酸辣汁，酸酸辣辣，刺激又醒胃。
招牌檸檬燒牛肉
成座小山丘嘅燒牛肉，份量十足，食之前一定要打卡啦！山頂放有蒜頭辣椒，配上山腰嘅牛肉一齊食，嫩滑又惹味；至於山腳就有吸收曬呢碟餸精華嘅芥蘭，簡單容易又清碟。
青檸明爐魚
泰發嘅泰式明爐魚係可揀烏頭或盲鰽，而我哋今次就揀咗魚身較滑嘅盲鰽魚。泰式酸酸辣辣嘅湯汁滲透晒成條魚，越煮越濃郁，至於魚肉肉質新鮮滑溜，索晒酸辣同香料，極具層次。
