【Now新聞台】季前足球熱身賽，曼聯大勝洛辛堡5比0。
紅魔鬼作客挪威變身藍魔鬼，安保姆一來壓入禁區，右腳都試一試。新加盟的安迪利山度士找到杜古，轉身窄位起腳又差點運氣，皮球中了遠柱出界。
攻勢停不了，施亞斯中圈斜線交前又有空位，曼聯輸給英冠域斯咸，今場31分鐘攻破洛辛堡，利斯扭回左腳射網仔打破缺口。與上場相比主教練卡域克作出兩個調動，門將維迪之外，利斯擔正亦交足貨，獲球迷選為今場最佳球員。約賀接應安保姆罰球頂中楣不入，半場只是一球交收，曼聯領先著返入更衣室。
換邊後入球陸續有來，施亞斯擺動身體一扭騙過，同一招來多下，再過門將禾斯迪送入空門，靠這位荷蘭前鋒瀟灑走一回，曼聯56分鐘贏到2比0。
大批後備跟著落場，丹維尼入替不久，就在小禁區「執到寶」，過多7分鐘擴大到3球差距。
右路卡馬臣之後助攻兩連擊，另一邊閘位的阿馬斯先受惠，伸盡射入成4比0，連同利斯及丹維尼，3位19歲小將分別建功。
臨尾位置再深入一點，伊芬威廉斯84分鐘近門埋齋，曼聯贏夠5比0，是季前熱身賽第一場勝利，下個月初轉戰瑞典，分別鬥馬德里體育會以及歐聯冠軍巴黎聖日耳門。
