【Now新聞台】英格蘭超級聯賽，阿仙奴反勝修咸頓3比1，曼城同樣在主場先失守下，3比2擊敗富咸。
紅衫富咸5場聯賽不敗，包括對上兩場贏了紐卡素及森林，26分鐘作客還先入球，占美利斯福至心靈後踭，皮利拉伸腳一射攻破艾達臣。不過角球堆在小禁區，走漏哥華傑治便要付出代價，曼城失守後6分鐘追成1比1。
皮球中了安達臣改變方向入網，下半場一出來，哥華傑治又再顯示後上能力，為藍月亮反先，富咸這次夠人手，但都阻止不到哥華傑治入個人第二球。杜古後備入替推至大位勁射，82分鐘曼城進一步拉開差距，同樣後備蒙尼斯在十二碼點一控一抽，富咸追成2比3，仍然要近6場首次落敗，曼城經歷兩連和後贏波沖喜。
阿仙奴亦在主場反勝，黃衫修咸頓靠艾查射遠柱，55分鐘破開僵局，落後反勝多得薩卡前場截到再斜線交給哈伐斯，在酋長球場腳風特別順，中柱入，3分鐘後射破前隊友藍斯度扳平，連續7場主場入球，媲美12年前的雲佩斯。
薩卡之後再為隊友度身訂做，尾柱的馬天尼利受惠，68分鐘兵工廠反先2比1，跟住角球差點又失守，拉也手槌打中對手反彈中楣，最後接了沒問題。阿仙奴在英超錄得第400場勝利，薩卡又捉中對方甩腳，射入成3比1，與曼城同樣7戰17分，得失球差也一樣，緊隨榜首利物浦之後。
