【A&M Diary】就嚟兔年，同各位字母粉拜個早年，祝大家身體健康，新年發大財！講到過年，就最緊要開開心心，去一個充滿新年氣氛嘅地方，行個大運啦！今年中環海濱嘅期間限定嘅新春幸運摩天輪，場內佈置充滿節日氣氛，記住同金兔影相打卡，仲可以玩攤位遊戲，最緊要係坐埋摩天輪，轉翻一個大運過年呀！
1. 新年好去處：新春幸運摩天輪 – 十二生肖造型擺設
今年係癸卯兔年，喺中環海濱嘅香港摩天輪就推出期間限定嘅新春幸運摩天輪！活動場內充滿新年氣氛，除咗掛滿多款色彩繽紛嘅燈籠，仲特別設計咗十二生肖嘅造型擺設，無論你屬咩生肖都好，記住同大大隻嘅金兔影相打卡，感受一吓金兔嘅旺氣，今年就一定財源廣進啦！
2. 新年好去處：新春幸運摩天輪 – 新春夢幻花燈走廊
講到全個新春幸運摩天輪嘅最大打卡點，當然就係新春夢幻花燈走廊。長長嘅走廊掛上唔同嘅花燈，非常適合一家人、情侶同成班朋友，慢步呢條金光閃爍嘅花燈走廊，影番一張大合照，寓意大家新一年平安健康。
3. 新年好去處：新春幸運摩天輪 – 賀年應節攤位遊戲
除咗影相打卡，喺新春幸運摩天輪場內仲有唔少賀年應節攤位遊戲，大會更準備咗超過30萬隻毛公仔，讓大家透過唔同遊戲，測試一吓自己嘅眼界同運氣，贏取深受小朋友歡迎嘅卡通入物、英雄人物等毛公仔，寓意大家新一年美夢成真。
4. 新年好去處：新春幸運摩天輪 – 轉轉轉幸運摩天輪
嚟到新一年，就梗係要轉個大運，而講到「大」就一定係香港摩天輪啦！摩天輪高60米，設置42個車廂，全程15至22分鐘，景觀以中環及維港對岸為主。當上到最高點，記住計下新年願望，祝大家心想事成。
5. 新年好去處：新春幸運摩天輪 – 閤家親子機動遊戲
另外，場內仲有唔少適合一家大細都啱玩嘅機動遊戲，一家人一齊玩就特別開心，咁新一年一定會一團和氣！
