雖然已經踏入秋天，不過天氣都仲係「夏日熱辣辣」，唔少人都會選擇去游水消暑，有無諗過帶埋狗狗一齊游呢？其實狗狗游水好處多，不但可以減輕同預防關節問題，仲可以減肥、減壓添！
今次到訪位於銅鑼灣的 PRIVATE i，店內設有狗狗恆溫游泳池，泳池池水經循環過濾系統，以紫外光燈活性碳消毒，仲有用消毒原液進行長效深層消毒，保障安全衞生；因為疫情關係，每節最多只有2隻狗狗一齊游，等主人可以放心帶狗狗過嚟游水。主人可以選擇親自落水，或者由助理寵物護理員陪狗狗游，幫助狗狗改善游水姿勢，強化關節同肌肉鍛煉。
店舖會提供狗狗救生衣
狗狗模特兒 Pepper 今次係第一次游水，落水之前舖頭會提供寵物救生衣畀狗狗，沖完身先至再落水。初時 Pepper 表現都有啲驚，只係游兩下就要人抱，之後助理寵物護理員就拎咗少少玩具陪佢玩，令 Pepper 即刻「如魚得水」，最後仲可以自己游晒成個池，非常叻仔！
Pepper 游得好開心！
游完水之後舖頭會提供毛巾、梘液同自助式洗吹服務，不過要幫「主子」沖涼又談何容易，所以呢度最好嘅地方，就係設有沖涼同寵物美容一站式服務，狗狗游完水就即刻可以剪毛扮靚，主人又唔使分開兩次帶狗狗出街，非常方便！
扮完靚即刻唔同晒～
設有休憩區畀主人同寵物玩，或者休息
場地及資訊提供：PRIVATEi PETS
狗狗模特兒：Pepper
