【Now新聞台】英格蘭超級聯賽，作客的曼城以5比0大勝西布朗，各項賽事11連勝升上第一，亦是今季英超第九支升上榜首的隊伍。
霍頓起左腳，莊士東撲到再中門柱，初段收起捷西斯排無鋒陣，兼且有迪布尼因傷缺陣的曼城，由根度簡一拖隨即起腳，6分鐘先開紀錄。
今場焦點是曼城的第二球，見到賓拿度施華右邊策動，旁證伊莉絲已經舉旗。這邊西布朗亦全都停下，簡些路無人力迫之下起腳，射中楣底入，當時球證鳴笛示意越位，但隨即又收到場邊提示，翻看重播原來是無越位，結果推翻原判入球成立。
鳴笛時也有點尷尬，20分鐘西布朗輸到兩球。
領隊艾拿戴斯稱，旁證伊莉絲明顯有犯錯，無奈他們有更多失誤，數次頭槌解不到圍，還被根度簡搶贏扣過，射入他今場第二球，曼城30分鐘有三球優勢。
臨完半場再有馬列斯右邊推回大位射入，半場領先到4比0比數。
自1986至87年球季之後，英格蘭頂級聯賽都未試過有9支球隊同一季上過榜首位置，緊隨史端寧57分鐘近門射入，曼城大勝5比0，成為今季第9支升上榜首隊伍，各項賽事連贏11場。
